नवी दिल्ली | दि. ०२ ( वास्तव पोस्ट न्यूज ) – लोकसभा निवडणुकीसाठी भाजपने उमेदवारांची पहिली यादी जाहीर केली आहे. त्यात १९५ उमेदवारांची नावे आहेत. पंतप्रधान नरेंद्र मोदी वाराणसीतून निवडणूक लढवणार आहेत. भाजपचे राष्ट्रीय सरचिटणीस विनोद तावडे यांनी पत्रकार परिषदेत सांगितले की, उमेदवारांच्या पहिल्या यादीत ३४ केंद्रीय मंत्री, राज्यमंत्री आणि लोकसभा अध्यक्षांचा समावेश आहे. २८ महिलांना तिकीट देण्यात आले आहे. यादीत समाविष्ट उमेदवारांपैकी ५७ ओबीसी समाजातील आहेत.
पहिल्या यादीत उत्तर प्रदेशातील ५१, पश्चिम बंगालमधील २०, मध्य प्रदेशातील २४, गुजरात आणि राजस्थानमधील १५-१५, केरळमधील १२, तेलंगणातील ९, आसाममधील ११, झारखंड आणि छत्तीसगडमधील ११-११, ५जणांचा समावेश आहे. दिल्लीतून, जम्मू आणि काश्मीरमधून २, उत्तराखंडमधून ३, अरुणाचल प्रदेशमधून २, गोवा, त्रिपुरा, अंदमान आणि निकोबार आणि दमण आणि दीवमधून प्रत्येकी १ उमेदवारांची नावे आहेत.
सुषमा स्वराज यांच्या कन्या बन्सुरी स्वराज यांना मिळाले तिकीट-
दिल्लीच्या 5 जागांसाठी उमेदवार जाहीर करण्यात आले आहेत. ईशान्य दिल्लीतून मनोज तिवारी, नवी दिल्लीतून सुषमा स्वराज यांची मुलगी बन्सुरी स्वराज, पश्चिम दिल्लीतून कमलजीत सेहरावत, दक्षिण दिल्लीतून रामवीर सिंग बिधुरी आणि दिल्ली चांदनी चौकातून प्रवीण खंडेलवाल यांना तिकीट मिळाले आहे.
अमित शहा गांधीनगरमधून निवडणूक लढवणार आहेत. मनसुख मांडविया यांना पोरबंदरमधून तिकीट मिळाले आहे. सीआर पाटील यांना नवसारीतून तिकीट मिळाले आहे. गुणामधून ज्योतिरादित्य सिंधिया यांना उमेदवारी देण्यात आली आहे. शिवराज सिंह चौहान यांना विदिशामधून तिकीट मिळाले आहे. आलोक शर्मा भोपाळमधून निवडणूक लढवणार आहेत. साध्वी प्रज्ञा यांचे तिकीट रद्द करण्यात आले आहे. ओम बिर्ला कोटामधून निवडणूक लढवणार आहेत. केंद्रीय मंत्री व्ही मुरलीधरन हे अटिंगलमधून तर केंद्रीय मंत्री राजीव चंद्रशेखर तिरुवनंतपुरममधून निवडणूक लढवणार आहेत.
भाजपच्या केंद्रीय निवडणूक समितीची बैठक पंतप्रधान नरेंद्र मोदी यांच्या अध्यक्षतेखाली पार पडली. यामध्ये पहिल्या यादीसाठी उमेदवारांची नावे निश्चित करण्यात आली. या बैठकीला उत्तर प्रदेशचे मुख्यमंत्री योगी आदित्यनाथ, गुजरातचे मुख्यमंत्री भूपेंद्र पटेल, मध्य प्रदेशचे मुख्यमंत्री मोहन यादव, छत्तीसगडचे मुख्यमंत्री विष्णू देव साई, उत्तराखंडचे मुख्यमंत्री पुष्कर सिंह धामी आणि गोव्याचे मुख्यमंत्री प्रमोद सावंत उपस्थित होते.
