जळगाव ( वास्तव पोस्ट ) : सामाजिक न्याय आणि अधिकारिता मंत्रालय (भारत सरकार ) व सामुदायिक रेडिओ संघटना, नवी दिल्ली यांच्या संयुक्त विद्यमाने “आमचे जेष्ठ, आमचा अभिमान “ या अभियानंतर्गत अटल वयो अभ्युदय योजने बद्दल जिल्ह्याभरात जनजागृती करण्यासाठी सामुदायिक रेडियो मनभावन ९०.८ एफ.एम. च्या माध्यमातून पुढील ४ महीने राबविण्यात येणार असून अटल वयो अभ्युदय योजने सोबतच जेष्ठ नागरिकांसाठी असलेल्या विविध योजनांची माहिती देण्यात येणार असल्याचे रेडिओ मनभावन चे संचालक अमोल देशमुख यांनी सांगितले.
जळगाव शहरातील रामानंदनगर परिसरात ‘जेष्ठ नागरिक मंडळ’ या ठिकाणी ४०-४५ वयोवृद्ध नागरिकांच्या उपस्थितीत अटल वयो अभ्युदय योजनेबद्दल कार्यक्रम घेण्यात आला. नंदकूमार बेंडाळे अध्यक्ष खान्देश कॉलेज एज्यूकेशन सोसायटी, जळगाव यांच्या संकल्पनेतून साकार झालेले रेडियो मनभावन ९०.८ एफ. एम. जिल्ह्यातील नागरिकांच्या सर्वांगीण विकासासाठी कटिबद्ध असल्याचे देशमुख म्हणाले.
यावेळी जेष्ठ नागरिक मंडळाचे संस्थापक अध्यक्ष, गुलाबराव बाविस्कर, अवचित पाटील, मधुकर पवार, गोटू देवरे, बरात पाटील, बाबुराव सोनवणे यांचेसह जेष्ठ नागरिक मंडळाचे सदस्य उपस्थित होते. यावेळी रेडियो मनभावनने प्रस्तुत केलेली संवाद नाटीका श्रोत्यांना ऐकवण्यात आली. वयोवृद्ध नागरिकांच्या समस्या टोल फ्री नंबर १४५६७ या क्रमांकावर संपर्क केल्यानंतर तात्काळ सोडवण्यात येईल तसेच बोलण्यासाठी, संवाद साधण्यासाठी संपर्क करावा असे आवाहन करण्यात आले. कार्यक्रमाच्या यशस्विततेसाठी राहुल पाटील, साहिल गायकवाड यांनी परिश्रम घेतले .
