सांगली | दि.१७ ( वास्तव पोस्ट न्यूज ) – सांगली येथील एका कॅफेत अल्पवयीन मुलीला गुंगीचे औषध देत असतांनाचे अश्लील व्हिडिओ तयार केले. त्यांनतर हे व्हिडीओ सामाजिक संकेत स्थळांवर व्हायरल करण्याची धमकी देऊन अत्याचार केल्याचा धक्कादायक प्रकार घडला. या घटनेमुळे शहरात एकच खळबळ उडाली आहे.
याप्रकरणी पीडित युवतीने दिलेल्या फिर्यादी वरुन आशिष शरद चव्हाण (वय २५, रा. बस्तवडे, ता. तासगाव) याच्यावर गुन्हा दाखल करण्यात आला असून विश्रामबाग पोलिसांनी त्याला अटक केली आहे.
मिळालेल्या माहितीनुसार पीडित युवती सांगलीतील महाविद्यालयात शिक्षण घेत असून शहरातच एका वसतिगृहात राहते. काही महिन्यांपूर्वी संशयित आशिष सोबत तिची ओळख झाली होती. एप्रिल २०२३ पासून युवती शिकवणीला जातांना संशयित आशिष तिचा वारंवार पाठलाग करत असे. पीडीतेचा मोबाईल क्रमांक मिळवून तो तिला सतत मेसेज करत असे, या गोष्टीला युवतीचा विरोध होता. याचा राग येऊन संशयित आशिषने पीडितेस धमकावले होते.
दरम्यान संशयितने २२ ते २६ एप्रिल २०२४ या कालावधीत पीडितेस शंभर फुटी रस्त्यावरील हँग ऑन कॅफे शॉपमध्ये नेले. तेथे कॉफीमधून तिला गुंगीचे औषध देऊन मोबाईलमध्ये पीडितेचे अश्लील व्हिडिओ काढून ते व्हायरल करण्याची धमकी दिली. यानंतर त्याने जबरदस्तीने पीडितेशी शारीरिक संबंध ठेवल्याचे फिर्यादीत नमूद करण्यात आले आहे. पोलिसांनी संशयित आशिष यास अटक केली असून त्याच्यावर गुन्हा दाखल केला. पोलिस अधिक तपास करत आहेत.
या घटनेमुळे संतप्त शिवप्रतिष्ठान युवा हिंदुस्तानच्या कार्यकर्त्यांनी आक्रमक पवित्रा घेत परिसरातील तीन कॅफेची तोडफोड केली. पोलिसांनी या तोडफोड प्रकरणी १६ कार्यकर्त्यांना ताब्यात घेतल्याचे समजते. शिवप्रतिष्ठान युवा हिंदुस्थानचे पदाधिकारी दिगंबर साळुंखे म्हणाले की, दोन वर्षांपासून आम्ही प्रशासनाकडे पत्र व्यवहार करत असून अनधिकृतपणे सुरू असलेले कॅफे बंद करून अल्पवयीन मुलामुलींचे होणारे शोषण थांबवा, अशी मागणी केली आहे. सहा महिन्यापूर्वी देखील शहरातील अशीच घटना समोर आली होती. असले प्रकार चालणारे कॅफे त्वरीत बंद करून कॅफे मालकांना सहआरोपी करण्याची मागणी करण्यात आली आहे. अन्यथा कॅफेसह मालकांना फोडू असा इशाराच शिवप्रतिष्ठान युवा हिंदुस्तानकडून देण्यात आला आहे.
