तेहरान | दि.१९ ( वास्तव पोस्ट न्यूज ) – इराणचे राष्ट्राध्यक्ष इब्राहिम रायसी यांना घेऊन जाणाऱ्या हेलिकॉप्टरला रविवारी अपघात झाला, त्यानंतर ते आपत्कालीन परिस्थितीत उतरवण्यात आले. इराणच्या सरकारी टेलिव्हिजनने ही माहिती दिली. रायसी इराणच्या पूर्व अझरबैजान प्रांतात प्रवास करत असताना धुके आणि खराब हवामानामुळे अपघात झाल्याचे सांगण्यात आले आहे. हेलिकॉप्टरशी अद्याप संपर्क झाला नसल्याचं वृत्त स्थानिक माध्यमांनी दिले आहे.
सरकारी न्यूज एजन्सी ‘IRNA’ च्या वृत्तानुसार, रायसी हे इराणचे परराष्ट्र मंत्री होसेन अमीराबदोल्लाहियान, इराणच्या पूर्व अझरबैजान प्रांताचे गव्हर्नर आणि इतर अधिकाऱ्यांसोबतही प्रवास करत होते. तेहरान टाईम्सच्या मते, इराणच्या राष्ट्राध्यक्षांच्या ताफ्यात तीन हेलिकॉप्टरचा समावेश होता, त्यापैकी दोन सुरक्षितपणे त्यांच्या स्थानी पोहोचले, परंतु एक अपघातग्रस्त झाले. इराणची राजधानी तेहरानच्या वायव्येस सुमारे ६०० किलोमीटर अंतरावर अझरबैजान देशाच्या सीमेवरील जोल्फा या शहराजवळ ही घटना घडल्याचे स्टेट टीव्हीने म्हटले आहे.
सरकारी टीव्हीने सांगितले की, बचाव कर्मचारी घटनास्थळी पोहोचण्याचा प्रयत्न करत आहेत. जोरदार वाऱ्यासह मुसळधार पाऊस आणि धुके पडल्याची नोंद आहे. ‘IRNA’ ने या भागाचे वर्णन ‘जंगल’ असे केले आहे. आयआरएनए किंवा सरकारी टीव्हीने रायसीच्या प्रकृतीबद्दल कोणतीही माहिती दिली नाही.
रायसी हे अझरबैजानमध्ये अझरबैजानचे राष्ट्राध्यक्ष इल्हाम अलीयेव यांच्यासमवेत धरणाचे उद्घाटन करण्यासाठी होते. ६३ वर्षीय रायसी हे कट्टरपंथी असून त्यांनी इराणच्या न्यायव्यवस्थेचेही नेतृत्व केले आहे. इराणचे सर्वोच्च नेते अयातुल्ला अली खमेनी यांचे शिष्य म्हणून त्यांच्याकडे पाहिले जाते. रायसी यांनी इराणच्या २०२१ च्या अध्यक्षीय निवडणुकीत विजय मिळवला होता.
