मुंबई l वास्तव पोस्ट वृत्तसेवा
मुंबई क्रिकेट असोसिएशन (MCA) तर्फे आयोजित ‘अवॉर्ड्स नाईट’ सोहळा नुकताच अत्यंत दिमाखात पार पडला. क्रिकेटच्या मैदानात अतुलनीय कामगिरी करून मुंबई आणि देशाचे नाव उंचावणाऱ्या चॅम्पियन्सचा गौरव या सोहळ्यात करण्यात आला. या कार्यक्रमाला राज्याचे माहिती तंत्रज्ञान व सांस्कृतिक कार्य मंत्री तथा बीसीसीआयचे खजिनदार आशिष शेलार यांच्यासह अनेक दिग्गज मान्यवरांची प्रमुख उपस्थिती होती.
दिग्गजांची मांदियाळी
या सोहळ्याला भारतीय क्रिकेट विश्वातील ‘लिटिल मास्टर’ सुनील गावस्कर, ‘कर्नल’ दिलीप वेंगसरकर आणि मुंबई क्रिकेट असोसिएशनचे अध्यक्ष अजिंक्य नाईक उपस्थित होते. तसेच एमसीएचे उपाध्यक्ष जितेंद्र आव्हाड, राजीव कुलकर्णी, एपेक्स कौन्सिलचे सदस्य, माजी क्रिकेटपटू आणि पदाधिकारी यांच्या उपस्थितीने कार्यक्रमाची शोभा वाढली.
विश्वविजेत्यांचा विशेष सन्मान
मुंबई क्रिकेटने जागतिक स्तरावर आपला जो वारसा जपला आहे, त्याचे प्रतिबिंब या सोहळ्यात पाहायला मिळाले. यावेळी प्रामुख्याने टी-२० विश्वचषक विजेते भारतीय खेळाडू, अंडर-१९ विश्वचषक विजेते, महिला अंडर-१९ विश्वचषक विजेत्या खेळाडू विजेत्यांचा गौरव करण्यात आला. याव्यतिरिक्त, वरिष्ठ महिला टी-२० ट्रॉफी विजेता संघ, अंडर-१४ वेस्ट झोन विजेते, अंडर-२३ महिला एकदिवसीय संघ, विजय मर्चेंट ट्रॉफी (अंडर-१६) आणि अंडर-१५ मुलींच्या एकदिवसीय स्पर्धेतील विजेत्या संघांचाही विशेष सन्मान करण्यात आला.
नवोदित खेळाडूंसाठी प्रेरणादायी क्षण
याप्रसंगी बोलताना मान्यवरांनी व्यक्त केले की, “क्रिकेटच्या मैदानात घाम गाळून यश संपादन करणाऱ्या या खेळाडूंचा गौरव करणे हा केवळ सन्मान नसून नवोदित खेळाडूंसाठी ती एक मोठी प्रेरणा आहे. मुंबई क्रिकेटची परंपरा आणि खेळाडूंची जिद्द यामुळेच आज जागतिक स्तरावर आपला दबदबा कायम आहे.”
हा सोहळा सर्व क्रिकेटप्रेमींसाठी आणि खेळाडूंसाठी अत्यंत प्रेरणादायी ठरला. उपस्थित मान्यवरांनी सर्व विजेत्या खेळाडूंचे त्यांच्या मेहनतीबद्दल आणि यशाबद्दल मनःपूर्वक अभिनंदन केले.
