कल्याण | दि.११ ( वास्तव पोस्ट न्यूज ) – कल्याण-डोंबिवलीच्या राष्ट्रसंत तुकडोजी महाराज प्रभाग क्षेत्र कार्यालय, ५/ड प्रभाग येथील भारतरत्न डॉ. बाबासाहेब आंबेडकर ज्ञान केंद्रात उभारण्यात आलेल्या भारतरत्न डॉ. बाबासाहेब आंबेडकर यांच्या पूर्णाकृती पुतळ्याचे अनावरण मुख्यमंत्री एकनाथ शिंदे यांच्या हस्ते दूरदृश्यप्रणालीद्वारे करण्यात आले. डॉ.बाबासाहेब आंबेडकर ज्ञान केंद्र स्मारक समिती, महाराष्ट्र शासन, कल्याण-डोंबिवली महानगरपालिका आणि खासदार डॉ.श्रीकांत शिंदे यांच्या विशेष प्रयत्नांतून हा भव्य पुतळा उभारण्यात आला आहे.
डॉ. बाबासाहेब आंबेडकर यांच्या शिकवणीनुसार सामाजिक क्रांतीचा वसा घेऊन हे शासन काम करीत आहे. स्वातंत्र्य, समता, बंधुभाव, शिक्षण, आर्थिक, विचार स्वातंत्र्य ही डॉ. बाबासाहेबांनी दिलेली शिकवण हाच या सरकारच्या राज्यकारभाराचा पाया आहे. या संविधानामुळेच सर्वसामान्य व्यक्ती खासदार, आमदार, मुख्यमंत्री बनू शकतो. डॉ.बाबासाहेबांचे कर्तृत्व हे अशा स्मारकांमध्ये निश्चितच मावणारे नाही. परंतु त्यांचा जीवनपट अशा स्मारकांमधून लोकांसमोर आणल्यानंतर हे स्मारक सर्वांसाठी ऊर्जास्रोत ठरणार आहे, असे सांगून सरकारच्या माध्यमातून या स्मारकाच्या पुढील निर्माणासाठी निधी कमी पडू दिला जाणार नाही, असे मनोगत मुख्यमंत्री एकनाथ शिंदे यांनी दूरदृश्यप्रणालीद्वारे स्पष्ट केले.
कल्याण येथे आयोजित कार्यक्रमास केंद्रीय सामाजिक न्याय राज्यमंत्री रामदास आठवले, खासदार डॉ श्रीकांत शिंदे, महानगरपालिका आयुक्त डॉ. इंदू राणी जाखड, डॉ.बाबासाहेब आंबेडकर ज्ञान केंद्र स्मारक समितीचे अध्यक्ष अण्णासाहेब रोकडे, उपाध्यक्ष विवेक जगताप, माजी महापौर रमेश जाधव, स्थानिक पदाधिकारी उपस्थित होते.
