जळगाव l वास्तव पोस्ट वृत्तसेवा
शालार्थ आणि सेवार्थ प्रणालीतून वेतन घेणाऱ्या सर्व शिक्षक आणि शिक्षकेतर कर्मचाऱ्यांसाठी महत्त्वाची बातमी आहे. शासनाच्या नवीन निर्णयानुसार, सर्व कर्मचाऱ्यांना आपली ई-केवायसी (e-KYC) प्रक्रिया पूर्ण करणे अनिवार्य करण्यात आले आहे. ही प्रक्रिया विहित मुदतीत पूर्ण न केल्यास, संबंधित कर्मचाऱ्यांचे माहे मे २०२६ चे वेतन (जे जूनमध्ये देय आहे) आहरीत केले जाणार नाही, असे स्पष्ट निर्देश शिक्षण विभागाने दिले आहेत.
मुदतवाढ आणि अंतिम संधी
वित्त विभागाने यापूर्वी २७ मार्च २०२६ रोजी काढलेल्या परिपत्रकानुसार एप्रिलअखेर ही प्रक्रिया पूर्ण करणे आवश्यक होते. मात्र, अनेक विभागांची कार्यवाही अपूर्ण असल्याने आता ही मुदत वाढवून देण्यात आली आहे. आता माहे मे २०२६ च्या वेतन देयकापूर्वी ही प्रक्रिया पूर्ण करणे बंधनकारक असून, यापुढे कोणतीही मुदतवाढ दिली जाणार नाही, असा इशाराही शासनाने दिला आहे.
ई-केवायसी प्रक्रिया कशी करावी?
१. बँकेत जाणे अनिवार्य: कर्मचाऱ्यांचे वेतन ज्या बँकेत जमा होते, त्या बँकेच्या शाखेत जाऊन ई-केवायसी पूर्ण करावी लागेल.
२. प्रमाणपत्र मिळवणे: बँकेत ई-केवायसी पूर्ण झाल्यानंतर संबंधित बँकेकडून त्याबाबतचे प्रमाणपत्र प्राप्त करणे आवश्यक आहे.
३. माहिती अद्ययावत करणे: सेवार्थ प्रणालीत बँक खात्याशी आधार क्रमांक आणि पॅन कार्ड (PAN Card) माहिती अचूक जोडलेली असल्याची खात्री करावी.
४. अपलोडिंग: बँकेकडून मिळालेले प्रमाणपत्र शालार्थ प्रणालीमध्ये विशिष्ट टॅब उपलब्ध झाल्यानंतर सूचना मिळाल्यावर अपलोड करावे लागेल.
दुबार वेतन रोखण्यासाठी पाऊल
शासकीय कर्मचाऱ्यांची माहिती सेवार्थ प्रणालीत नोंदवलेली असते. कोणतीही दुबार माहिती नोंदवली जाऊ नये किंवा एकाच व्यक्तीला दोनदा वेतन अदा होऊ नये, यासाठी पारदर्शकता आणण्याच्या उद्देशाने शासनाने ही ठोस उपाययोजना केली आहे.
कोणास लागू आहे हा नियम?
हा नियम सर्व जिल्हा परिषदा, मान्यताप्राप्त व अनुदानित खासगी प्राथमिक, माध्यमिक व उच्च माध्यमिक शाळा, सैनिकी शाळा आणि अध्यापक विद्यालयातील सर्व शिक्षक व शिक्षकेतर कर्मचाऱ्यांना लागू आहे.
“सदर ई-केवायसी प्रक्रिया वेळेत पूर्ण न केल्यास आणि त्यामुळे वेतनासंबंधी काही तांत्रिक अडचण निर्माण झाल्यास, त्याची सर्व जबाबदारी संबंधित मुख्याध्यापक आणि कर्मचाऱ्यांची राहील,” असे जळगाव माध्यमिक शिक्षण विभागाच्या वेतन व भविष्य निर्वाह निधी पथकाद्वारे कळवण्यात आले आहे.
