नाशिक/जळगाव l वास्तव पोस्ट वृत्तसंस्था
आध्यात्मिक गुरुचा बुरखा पांघरून महिलांचे शोषण आणि कोट्यवधींची फसवणूक करणाऱ्या अशोक कुमार एकनाथ खरात उर्फ ‘कॅप्टन’ याच्या काळ्या कारनाम्यांची व्याप्ती आता शिक्षण क्षेत्रापर्यंत पोहोचली आहे. विश्वासार्ह सूत्रांच्या माहितीनुसार, राज्यभर गाजत असलेल्या ‘शालार्थ आयडी’ (Shalarth ID) घोटाळ्यात खरातचे थेट कनेक्शन समोर आले असून, त्याने आपल्या जवळच्या नातेवाईकांसाठी नियमबाह्य पद्धतीने आयडी मिळवल्याचा संशय व्यक्त केला जात आहे.
काय आहे खरातचे कनेक्शन?
तपासात असे समोर आले आहे की, खरातने २०२२ ते २०२५ या काळात राजकीय प्रभावाचा वापर करून शिक्षण विभागातील अधिकाऱ्यांच्या संगनमताने अनेक बोगस नियुक्त्या पदरात पाडून घेतल्या. विशेषतः नाशिक आणि जळगाव जिल्ह्यातील काही शाळांमध्ये त्याच्या जवळच्या नातेवाईकांना शिक्षक म्हणून घुसखोरी करण्यास त्याने मदत केल्याचा आरोप आहे. यामध्ये त्याच्या भावाचेही नाव चर्चेत असून, सिन्नर तालुक्यातील एका कॉलेजमध्ये कार्यरत असलेल्या या नातेवाईकाचा ‘शालार्थ आयडी’ संशयाच्या भोवऱ्यात आहे.
नेमका काय आहे ‘शालार्थ आयडी’ घोटाळा?
राज्यात सध्या १,५३० हून अधिक शिक्षक आणि कर्मचाऱ्यांचे शालार्थ आयडी बोगस असल्याचे प्राथमिक तपासात निष्पन्न झाले आहे. यात नाशिक विभागातील जळगाव, धुळे आणि नंदुरबार जिल्ह्यांचा मोठा समावेश आहे. ‘एसआयटी’ (SIT) कडून या प्रकरणाची सखोल चौकशी सुरू असून, यात आता अशोक खरातचे नाव आल्याने प्रशासकीय वर्तुळात मोठी खळबळ उडाली आहे.
‘शालार्थ आयडी’ (Shalarth ID) म्हणजे काय?
अनेकांना प्रश्न पडतो की हा ‘शालार्थ आयडी’ नेमका काय असतो? त्याची थोडक्यात माहिती खालीलप्रमाणे:
• डिजिटल ओळख: ‘शालार्थ’ ही महाराष्ट्र शासनाच्या शिक्षण विभागाची एक ऑनलाइन प्रणाली आहे. ज्याप्रमाणे प्रत्येक नागरिकाचा आधार कार्ड नंबर असतो, त्याचप्रमाणे प्रत्येक अधिकृत शिक्षक आणि शिक्षकेतर कर्मचाऱ्याला एक विशिष्ट ‘शालार्थ आयडी’ दिला जातो.
• वेतन प्रणाली: शिक्षकांचे पगार थेट बँकेत जमा होण्यासाठी हा आयडी अनिवार्य असतो. या प्रणालीमुळे कागदपत्रांची देवाणघेवाण कमी होऊन पारदर्शकता येते.
• घोटाळा कसा होतो?: जेव्हा एखादा अपात्र व्यक्ती किंवा बोगस शिक्षक, शिक्षण विभागातील भ्रष्ट अधिकाऱ्यांशी हातमिळवणी करून खोटी कागदपत्रे सादर करतो आणि प्रणालीमध्ये आपला नंबर (ID) जनरेट करून घेतो, तेव्हा त्याला सरकारी तिजोरीतून पगार सुरू होतो. यालाच ‘बोगस शालार्थ आयडी घोटाळा’ म्हणतात.
या प्रकरणात आणखी कोणते बडे मासे अडकणार, याकडे आता सर्वांचे लक्ष लागले आहे.
