मुंबई l वास्तव पोस्ट वृत्तसेवा
भंडारा जिल्ह्यातील गोसीखुर्द जलाशयातील जलपर्यटनाला चालना देण्यासाठी राज्य सरकारने पावले उचलली आहेत. या प्रकल्पाच्या पहिल्या टप्प्यातील कामे त्वरित पूर्ण करून, दुसऱ्या टप्प्याचा सविस्तर प्रस्ताव जिल्हाधिकाऱ्यांनी तातडीने सादर करावा, असे निर्देश उपमुख्यमंत्री एकनाथ शिंदे यांनी दिले आहेत.
पहिल्या टप्प्यातील कामांचा आढावा
सह्याद्री अतिथीगृह येथे आयोजित बैठकीत उपमुख्यमंत्री शिंदे यांनी गोसीखुर्द जलाशयातील जलपर्यटनाच्या प्रगतीचा आढावा घेतला. पहिल्या टप्प्यात सुरू असलेल्या जेट्टीचे काम विहित वेळेत आणि दर्जेदार पद्धतीने पूर्ण करण्याच्या सूचना त्यांनी यावेळी प्रशासनाला दिल्या. या प्रकल्पामुळे विदर्भातील पर्यटनाला मोठी गती मिळणार असून स्थानिक रोजगार निर्मितीलाही चालना मिळणार आहे.
प्रशासकीय यंत्रणेला तत्परतेचे आदेश
या प्रकल्पामुळे पर्यटकांना आकर्षित करण्यासाठी आवश्यक त्या सर्व सोयीसुविधा उभारण्यावर भर देण्यात येत आहे. दुसऱ्या टप्प्यातील नियोजित कामांसाठी तांत्रिक आणि प्रशासकीय मान्यता घेण्याची प्रक्रिया तातडीने पूर्ण करण्याचे नियोजन जिल्हा प्रशासनाने करावे, असेही बैठकीत स्पष्ट करण्यात आले.
मान्यवरांची बैठकीतील उपस्थिती
या बैठकीला आमदार नरेंद्र भोंडेकर, उपमुख्यमंत्र्यांचे अपर मुख्य सचिव असीम गुप्ता, नगरविकास विभागाचे अपर मुख्य सचिव गोविंदराज, पर्यटन विभागाचे प्रधान सचिव संजय खंदारे, पर्यटन विकास महामंडळाचे व्यवस्थापकीय संचालक निलेश गटणे उपस्थित होते. तसेच जलसंपदा विभागाचे सचिव संजय बेलसरे, भंडाऱ्याचे जिल्हाधिकारी आणि गोसीखुर्द प्रकल्पाचे मुख्य अभियंता दूरदृश्यप्रणालीच्या माध्यमातून या बैठकीत सहभागी झाले होते.
