जळगाव l वास्तव पोस्ट न्यूज नेटवर्क
भारताला शेती क्षेत्रात आत्मनिर्भर बनवण्यासाठी आधुनिक तंत्रज्ञान आणि जलव्यवस्थापन ही काळाची गरज आहे. जळगावच्या जैन हिल्सवर राबवलेले प्रयोग हे देशाला प्रगतीकडे नेणारे आहेत, असा विश्वास केंद्रीय कृषीमंत्री शिवराज सिंह चौहान यांनी व्यक्त केला. जैन इरिगेशन सिस्टीम्स लि. च्या जैन हिल्स येथील विविध कृषी प्रात्यक्षिकांची पाहणी करण्यासाठी ते जळगाव दौऱ्यावर आले होते.
ठिबकवरील भात शेतीचे आश्चर्य:
पारंपारिकपणे भात पिकाला प्रचंड पाणी लागते असा समज असताना, जैन हिल्सवर मागील २० वर्षांपासून ठिबक सिंचनावर घेतले जाणारे भाताचे पीक पाहून नामदार चौहान यांनी आश्चर्य व्यक्त केले. प्रवाही सिंचनापेक्षा ठिबकवर भाताचे उत्पादन अधिक मिळते, दाणा उत्तम पोसला जातो आणि पीक लोळत नाही, हे पाहून त्यांनी आगामी काळात भात उत्पादक राज्यांमध्ये या तंत्रज्ञानाला प्रोत्साहन देण्याचे आश्वासन दिले.
फ्युचर फार्मिंग आणि तंत्रज्ञानाची पाहणी:
कृषीमंत्र्यांनी यावेळी जैन इरिगेशनच्या विविध प्रकल्पांना भेट दिली:
• टिश्यूकल्चर प्रयोग: हळद, आले, जैन स्वीट ऑरेंज, डाळिंब आणि संत्रा यांची रोगमुक्त रोपे कशी तयार केली जातात याची माहिती त्यांनी घेतली.
• क्लायमेट स्मार्ट शेती: हवामान बदलाच्या संकटात ग्रीनहाऊस, पॉलिहाऊस आणि शेडनेटमधील शेती कशी फायदेशीर आहे, यावर त्यांनी शास्त्रज्ञांशी चर्चा केली.
• नाविन्यपूर्ण पिके: उष्ण वातावरणात काळी मिरीचे उत्पादन, हायड्रोपोनिक्स, एरोपोनिक्स आणि व्हर्टिकल फार्मिंगचे प्रात्यक्षिक त्यांनी पाहिले.
• सिक्स इन वन तंत्रज्ञान: ऊस पिकासाठी हे तंत्रज्ञान उत्पादन वाढीसाठी कसे पूरक ठरते, याचा त्यांनी अनुभव घेतला.
विशेष म्हणजे, ग्रीनहाऊस मधील केळी बागेची पाहणी करताना नामदार चौहान यांनी स्वतःच्या आवाजात एक व्हिडीओ शूट करून तो सोशल मीडियावर व्हायरल केला.
मान्यवरांची उपस्थिती:
या दौऱ्याप्रसंगी जैन इरिगेशनचे चेअरमन अशोक जैन यांनी कृषीमंत्र्यांचे स्वागत केले. यावेळी केंद्रीय क्रीडा राज्यमंत्री रक्षा खडसे, खासदार स्मिता वाघ, आमदार सुरेश भोळे, जिल्हाधिकारी रोहन घुगे, राष्ट्रीय केळी संशोधन केंद्राचे संचालक डॉ. आर. सेल्व्हराजन, भारतीय कृषी अनुसंधान परिषदेचे (फलोद्यान) अतिरिक्त महासंचालक डॉ. बी. व्ही. पटेल, राज्याचे फलोद्यान संचालक अंकुश माने, नॅशनल हॉर्टिकल्चर बोर्डाचे डॉ. विजय दोहरे आणि सहसचिव प्रियरंजन दास उपस्थित होते.
चर्चेमध्ये जैन इरिगेशनचे उपाध्यक्ष व व्यवस्थापकीय संचालक अनिल जैन, सह-व्यवस्थापकीय संचालक अजित जैन व अतुल जैन यांच्यासह डॉ. के. बी. पाटील, डॉ. बी.के. यादव, डॉ. अनिल ढाके, डॉ. अनिल पाटील व बी. डी. जडे या तज्ज्ञांनी सहभाग घेतला.
विज्ञानाची कास धरल्यास भारतीय शेती जागतिक स्तरावर प्रगत होईल, अशी पावती देऊन नामदार चौहान यांनी जैन हिल्सच्या कार्याचे कौतुक केले.
