‘पीस बिल्डर्स फोरम इंडिया’च्या राष्ट्रीय बैठकीत सहभागी झालेले शांतीदूत.
वास्तव पोस्ट l जळगाव : आजच्या बदलत्या काळात तरुण पिढीमध्ये सोशल मीडिया, चित्रपट आणि खेळणी उद्योगाद्वारे हिंसेचे आकर्षण निर्माण केले जात आहे. हे रोखून अहिंसक समाज घडवण्यासाठी शासन, अर्थव्यवस्था आणि शिक्षण क्षेत्रात आमूलाग्र बदलांची गरज असल्याचे प्रतिपादन मान्यवरांनी येथे केले.
जैन हिल्स येथे गांधी रिसर्च फाउंडेशन आणि एकता परिषद यांच्या संयुक्त विद्यमाने आयोजित ‘पीस बिल्डर्स फोरम इंडिया’ या राष्ट्रीय बैठकीच्या दुसऱ्या दिवशी देश-विदेशातील शांतिदूतांनी आपले विचार मांडले. ८ मार्चपासून सुरू झालेल्या या बैठकीत ५० हून अधिक प्रतिनिधी सहभागी झाले आहेत.
शांततेसाठी ‘चतुःसूत्री’चा मंत्र
एकता परिषदेचे संस्थापक पी. व्ही. राजगोपाल यांनी याप्रसंगी सखोल मार्गदर्शन केले. ते म्हणाले की, “शांततापूर्ण समाजासाठी केवळ भाषणे पुरेशी नाहीत, तर अहिंसक शासन व्यवस्था, अहिंसक अर्थव्यवस्था, मूल्यधिष्ठित शिक्षण आणि सक्रिय सामाजिक आंदोलने या चतुःसूत्रीचा अवलंब करणे आवश्यक आहे.”
अनुभवातून शांतीचा मार्ग
बैठकीत विविध क्षेत्रांतील तज्ज्ञांनी आपापले अनुभव कथन केले:
- संजयभाई (गुजरात): २००२ च्या दंगलींनंतर केवळ संवाद आणि एकमेकांवरील विश्वासाच्या जोरावर पुनर्वसन कसे शक्य झाले, याचा वस्तुपाठ त्यांनी मांडला.
- रजनी बक्षी (ज्येष्ठ पत्रकार): मुंबईतील ‘मोहल्ला समिती’ मॉडेलचा दाखला देत त्यांनी सामुदायिक स्तरावर विश्वासार्हता निर्माण करण्याचे आवाहन केले.
- डॉ. देबेन (मणिपूर): राजकारण आणि शिक्षण व्यवस्था संविधानातील न्याय व समतेच्या तत्त्वांवर आधारित असल्यास हिंसा आपोआप कमी होईल, असे त्यांनी नमूद केले.
महिलांचे नेतृत्व आणि संरचनात्मक बदल
आंतरराष्ट्रीय कार्यकर्त्या ललिता रामदास यांनी व्हिडिओ संदेशाद्वारे शांतता प्रक्रियेत महिलांच्या भूमिकेचे महत्त्व अधोरेखित केले. तर जिल कॅर-हॅरिस यांनी वैयक्तिक बदलासोबतच व्यवस्थेत बदल घडवून आणण्यासाठी महिलांनी पुढाकार घेण्याचे आवाहन केले.
या बैठकीत प्रशासकीय संवेदनशीलता, शाळांमध्ये ‘पीस क्लब’ची स्थापना आणि ‘शांती सेना’ संघटन यांसारख्या विषयांवरही सविस्तर चर्चा करण्यात आली. या सत्रात अबीदा, मृत्युंजय, अनंत गिरी, डॉ. कुप्पु स्वामी यांच्यासह अनेक मान्यवरांनी सहभाग घेतला. हा कार्यक्रम ११ मार्च रोजी समारोप सोहळ्याने संपन्न होईल.
