वास्तव पोस्ट l जळगाव : गांधी रिसर्च फाऊंडेशन आणि एकता परिषद यांच्या संयुक्त विद्यमाने आयोजित ‘पीस बिल्डर्स फोरम’ या तीन दिवसीय राष्ट्रीय परिषदेचे उद्घाटन जळगाव येथील गांधी तीर्थमध्ये उत्साहात करण्यात आले. कस्तुरबा सभागृहात झालेल्या या सोहळ्यात महात्मा गांधी आणि कस्तुरबा गांधी यांच्या प्रतिमेला माल्यार्पण करून कार्यक्रमाची सुरुवात झाली.
कार्यक्रमास मान्यवरांची उपस्थिती
या उद्घाटन प्रसंगी मंचावर कांताई नेत्रालयाच्या संचालिका डॉ. भावना जैन, गांधी रिसर्च फाऊंडेशनच्या डॉ. गीता धरमपाल, एकता परिषदेचे अध्यक्ष राजगोपाल, जिल कारहॅरीस, सावत्रीबेन आणि इंद्राजी यांची प्रमुख उपस्थिती होती.
या तीन दिवसीय (दि.९ ते ११ मार्च) परिषदेत शांती, न्याय आणि सामाजिक परिवर्तनाच्या विविध पैलूंवर चर्चा केली जाणार आहे. या कार्यक्रमाचे वैशिष्ट्य म्हणजे यात कॅनडासह भारतातील आंध्रप्रदेश, केरळ, बिहार, तामिळनाडू, मणिपूर, नागालॅंड, महाराष्ट्र आणि दिल्ली अशा विविध राज्यांतील मान्यवर ‘पीस वर्कर’ सहभागी झाले आहेत.
नृत्यातून महिला शक्तीचा जागर
योगायोगाने हा कार्यक्रम आंतरराष्ट्रीय महिला दिनाचे औचित्य साधून आयोजित केल्याने महिला शक्तीला समर्पित विशेष सांस्कृतिक कार्यक्रम सादर करण्यात आले.
कथक सादरीकरण: डॉ. अपर्णा भट-कासार संचलित ‘प्रभाकर कला संगीत अकॅडमी’च्या विद्यार्थिनींनी मंत्रमुग्ध करणारे कथक नृत्य सादर केले.
नृत्यातील विषय: वंदेमातरमने सुरुवात झाल्यानंतर देवी स्तुतीतून आदिशक्तीला वंदन करण्यात आले. तसेच कृष्ण भजनाने उपस्थितांना भक्तीची अनुभूती दिली.
सहभागी कलाकार: श्रेया अग्रवाल, तेजस्विनी क्षीरसागर, संस्कृती गवळे, मधुरा इंगळे, दीपिका घैसास, समृद्धी पाटील, वरदा तळेले यांनी आपल्या कलेने उपस्थितांची मने जिंकली.
शांती आणि न्यायाचा संदेश
डॉ. गीता धरमपाल यांनी महिला दिनानिमित्त शुभेच्छा देत गांधी रिसर्च फाऊंडेशनच्या कार्याची माहिती दिली. जिल कारहॅरीस यांनी संवाद आणि प्रशिक्षणातून समाजात बदल घडवण्याचे महत्त्व अधोरेखित केले. महात्मा गांधींच्या विचारांतूनच शांती आणि न्याय प्रस्थापित होईल, असा विश्वास त्यांनी व्यक्त केला. यावेळी २०१६ मध्ये आयोजित आंतरराष्ट्रीय महिला परिषदेची विशेष माहितीपट (डॉक्युमेंट्री) दाखवण्यात आली. कार्यक्रमाचे स्वागतपर मनोगत दीपक मिश्रा यांनी व्यक्त केले.
सदर तीन दिवसीय राष्ट्रीय परिषदेत शांतीच्या विविध आयामांवर चर्चासत्रे, माहितीपट प्रदर्शन आणि मान्यवरांशी थेट संवाद, तसेच युवा प्रशिक्षण आणि शांती निर्माणासाठी कार्यशाळेचे आयोजन करण्यात आले आहे.
