विजयवाडा ( प्रतिनिधी ): आंध्र प्रदेशमधील विजयवाडा येथे घटनेचे शिल्पकार विश्वरत्न डॉ.बाबासाहेब आंबेडकरांच्या जगातील सर्वात मोठ्या पुतळ्याचे अनावरण मुख्यमंत्री जगनमोहन रेड्डी यांच्या हस्ते करण्यात आले.
आंध्र प्रदेशचे मुख्यमंत्री वायएस जगमोहन रेड्डी यांनी डॉ.बाबासाहेब आंबेडकरांच्या पुतळ्याचे अनावरण केले. विजयवाडा येथे उभारण्यात आलेला हा डॉ.आंबेडकरांचा जगातील सर्वात उंच असा पुतळा आहे. या पुतळ्याची उंची सुमारे २०६ फुट इतकी आहे. हा पुतळा ८१ फुटाच्या पॅडस्टलवर उभा आहे. पॅडस्टलशिवाय त्याची उंची १२५ फुट इतकी होते. स्वराज मैदानावर उभारण्यात आलेल्या या पुतळ्याजवळ एक्सपिरियन्स सेंटर, २ हजार लोक बसू शकतील असे कन्व्हेन्शन सेंटर, एक फुड कोर्ट, मुलांना खेळण्यासाठी जागा, जलकुंभ, संगीत कारंजे अशा सुविधा आहेत.
स्वराज्य मैदानावर हा पुतळा उभारण्यात आला असुन त्याचे नाव आता अधिकृतपणे डॉ.बी.आर.आंबेडकर स्वराज्य मैदाना असे करण्यात आले आहे. पुतळ्याचे अनावरण झाल्यानंतर या ठिकाणी सर्वांना प्रवेश असेल. राज्याच्या माहिती आणि जनसंपर्क विभागाने दिलेल्या माहितीनुसार, हा देशातील सर्वात उंच बिगर-धार्मिक पुतळा आहे. तसेच याची निर्मिती पूर्णपणे भारतीय आहे.
हा संपूर्ण प्रकल्प नोएडा येथील डिझाइन असोसिएट्स यांनी तयार केला आहे. ज्यात डॉ.बी.आर. आंबेडकर एक्सपिरियन्स सेंटर, कन्व्हेन्शन सेंटर आणि आदी गोष्टींचा समावेश आहे. या कामासाठी ५०० कर्मचारी आणि ५५ इंजिनिअर २ वर्ष मेहनत घेत होते. या पुतळ्यासाठी ४०० टेन स्टेनलेस स्टील आणि १२० टन ब्राँझचा वापर करण्यात आलाय. या ठिकाणी दोन मिनी थिएटर देखील असून येथे आंबेडकरांवरील लघुपट दाखवले जाणार आहेत. परिसरात सहा जलकुंभ असून प्रकल्पाच्या मध्यभागी संगीत कारंजा करण्यात आला आहे.
स्वराज मैदानावरील जगातील सर्वात उंच आंबेडकरांचा पुतळ्याला ‘सामाजिक न्यायाचा पुतळा’ असे नाव देण्यात आले आहे. जगातील सर्वात उंच ५० पुतळ्यांमध्ये याचा समावेश असेल. या यादीत गुजरातमधील सरदार पटेल यांचा ७९० फुट पुतळा सर्वात उंच आहे. तर आंबेडकरांचा दुसऱ्या क्रमांकाचा सर्वात उंच पुतळा तेलंगणा राज्यातील हैदराबाद येथे आहे. या पुतळ्याच्या निर्मितीची घोषणा राज्य सरकारने २०२० मध्ये केली होती. यासाठी २६८ कोटी इतका निधी मंजूर करण्यात आला होता. पुतळ्याच्या आणि स्वराज मैदानावरील कामाला जून २०२० मध्ये सुरुवात झाली होती.
