मुंबई/जळगाव l वास्तव पोस्ट वृत्तसंस्था
प्रशासकीय कामकाजात पारदर्शकता, गतीमानता आणि आधुनिक तंत्रज्ञानाचा प्रभावी वापर करण्यात जळगाव जिल्हा प्रशासनाने संपूर्ण राज्यात बाजी मारली आहे. राज्य शासनाच्या ‘सेवाकर्मी प्लस’ आणि १५० दिवसांच्या ई-गव्हर्नन्स सुधारणा कार्यक्रमांतर्गत जळगाव जिल्हाधिकारी कार्यालय राज्यात प्रथम क्रमांकाचे मानकरी ठरले आहे. या देदीप्यमान यशाबद्दल मुंबईतील सह्याद्री अतिथीगृहात आयोजित विशेष सोहळ्यात मुख्यमंत्री देवेंद्र फडणवीस यांच्या हस्ते जिल्हाधिकारी रोहन घुगे आणि जिल्हा परिषदेच्या मुख्य कार्यकारी अधिकारी (CEO) मीनल करनवाल यांना विशेष पुरस्काराने सन्मानित करण्यात आले.
सात निकषांवर जळगाव ‘नंबर वन’
भारतीय गुणवत्ता परिषद (QCI) मार्फत या कार्यक्रमाचे अत्यंत काटेकोर मूल्यमापन करण्यात आले होते. एकूण २०० गुणांपैकी १८८ गुण मिळवून जळगावने अव्वल स्थान पटकावले. या यशामागे प्रशासनाने राबवलेली सात मुख्य सूत्रे महत्त्वाची ठरली:
१. अद्ययावत संकेतस्थळ: नागरिकांसाठी अत्यंत सुलभ आणि माहितीपूर्ण वेबसाईटची निर्मिती.
२. ‘आपले सरकार’ प्रभावी अंमलबजावणी: शासकीय सेवा वेळेत मिळण्यासाठी प्रणालीचा सक्षमीकरण.
३. ई-ऑफिसचा १००% वापर: प्रशासकीय कामकाजातून कागदाचा वापर कमी करून पूर्णपणे डिजिटल कामकाज.
४. डिजिटल डॅशबोर्ड: कामकाजाच्या प्रभावी देखरेखीसाठी अद्ययावत डॅशबोर्ड यंत्रणा.
५. व्हॉट्सॲप चॅटबॉट: नागरिकांना घरबसल्या माहिती मिळावी यासाठी स्वयंचलित संवाद सेवा.
६. प्रगत तंत्रज्ञानाचा वापर: एआय (AI) आणि ब्लॉकचेन सारख्या आधुनिक तंत्रज्ञानाचा कल्पक उपयोग.
७. जीआयएस (GIS) प्रणाली: भौगोलिक माहिती प्रणालीचा प्रशासकीय नियोजनात प्रभावी वापर.
यश जळगावकरांना समर्पित : जिल्हाधिकारी रोहन घुगे
या सन्मानानंतर बोलताना जिल्हाधिकारी रोहन घुगे यांनी हे यश सांघिक प्रयत्नांचे असल्याचे सांगितले. ते म्हणाले, “जिल्हा प्रशासनातील सर्व अधिकारी आणि कर्मचारी यांच्या समन्वयामुळेच हे शक्य झाले आहे. हे यश आम्ही समस्त जळगावकर नागरिकांना समर्पित करतो.”
प्रशासकीय वर्तुळातून कौतुकाचा वर्षाव
या सोहळ्याला राज्याचे मुख्य सचिव राजेश अग्रवाल, मंत्री आशिष शेलार, पोलीस महासंचालक डॉ. सदानंद दाते यांच्यासह विविध विभागांचे वरिष्ठ अधिकारी उपस्थित होते. ‘सेवाकर्मी प्लस’ अंतर्गत जिल्हा परिषदेने केलेल्या उल्लेखनीय कामगिरीबद्दल सीईओ मीनल करनवाल यांचाही गौरव करण्यात आल्याने जळगावच्या शिरपेचात मानाचा तुरा रोवला गेला आहे.
