धुळे l वास्तव पोस्ट वृत्तसेवा
गांधीवादी विचारांच्या प्रसारासाठी आपले संपूर्ण आयुष्य समर्पित करणारे, उत्तर प्रदेश सर्वोदय मंडळाचे अध्यक्ष रामधीरज बालेश्वरजी सिंग यांना यंदाचा मानाचा ‘जमनाबेन लोकसेवक पुरस्कार’ जाहीर झाला आहे. रविवारी, ५ एप्रिल २०२६ रोजी सायंकाळी धुळे येथील बर्वे छात्रालयात एका विशेष सोहळ्यात त्यांना हा पुरस्कार प्रदान करण्यात येईल.
पुरस्कार सोहळा रविवार, दि.५ एप्रिल रोजी सायंकाळी ५:३० वाजता बर्वे छात्रालय, धुळे येथे माजी कुलगुरू डॉ. एन. के. ठाकरे तसेच धुळे मनपाच्या महापौर मायादेवी परदेशी यांच्या हस्ते गौरवण्यात येईल. अध्यक्षस्थानी रमेश दाणे (संपादक, साम्यकदर्शन) असतील. जळगाव येथील हरिजन सेवक संघाचे शंभू पाटील यांचे ‘महात्मा गांधी आणि अहिंसा’ या विषयावर विशेष व्याख्यान होईल.
पुरस्काराचे स्वरूप आणि वैशिष्ट्य
मालेगाव येथील महाराष्ट्र गो विज्ञान समितीच्या वतीने दिला जाणारा हा पुरस्कार जैन इरिगेशनच्या भवरलाल अँड कांताबाई जैन फाउंडेशन (गांधीतीर्थ) द्वारे पुरस्कृत आहे. सर्वोदयी कार्यकर्त्यांमध्ये अत्यंत प्रतिष्ठेच्या मानल्या जाणाऱ्या या पुरस्काराचे स्वरूप ५१ हजार रुपयांचा धनादेश, शाल, श्रीफळ आणि मानचिन्ह, मानपत्र असे राहील. याप्रसंगी रामधीरजजींच्या कार्याचा आढावा घेणारा एक लघुपट देखील दाखवण्यात येणार आहे.
कोण आहेत रामधीरजजी? (थोडक्यात परिचय)
रामधीरजजींचा जन्म १४ डिसेंबर १९५४ रोजी वाराणसीत झाला. अलाहाबाद विद्यापीठातून शिक्षण पूर्ण केल्यानंतर त्यांनी १९७४ च्या जयप्रकाश नारायण यांच्या आंदोलनात सक्रिय सहभाग घेतला. आणीबाणीच्या काळात १८ महिने कारावास भोगला. १९८९ मध्ये ‘आजादी बचाओ आंदोलन’ आणि ‘लोक स्वराज अभियान’ सुरू केले. बहुराष्ट्रीय कंपन्यांविरुद्ध स्वदेशी चळवळ उभारण्यात त्यांचा मोठा वाटा आहे. सध्या ते उत्तर प्रदेश सर्वोदय मंडळाचे अध्यक्ष म्हणून कार्यरत असून वाराणसीतील वारसा स्थळांच्या रक्षणासाठी सत्याग्रहाद्वारे लढा देत आहेत.
गांधी रिसर्च फाउंडेशन, भवरलाल अँड कांताबाई जैन फाउंडेशन (जळगाव) आणि महाराष्ट्र गो विज्ञान समिती (मालेगाव) यांच्या वतीने या सोहळ्याला मोठ्या संख्येने उपस्थित राहण्याचे आवाहन करण्यात आले आहे.
