मुंबई | दि.१९( वास्तव पोस्ट न्यूज ) – एन्काऊंटर स्पेशालिस्ट म्हणून ख्याती असलेले माजी पोलिस अधिकारी प्रदीप शर्मा यांना लखन भैया चकमक प्रकरणात मुंबई उच्च न्यायालयाने जन्मठेपेची शिक्षा सुनावली आहे. शर्मा यांनी ३१२ एन्काऊंटरमध्ये भाग घेतला असून त्यांनी १०० हुन अधिक गुंडांचे एन्काऊंटर केले आहे. अंडरवर्ल्डमधील गुंडांसह लष्कर- ए-तोयबाच्या अतिरेक्यांचाही यात समावेश आहे.
११ नोव्हेंबर २००६ मध्ये रोजी अंधेरीत सातबंगला येथे रामणारायण गुप्ता उर्फ लखन भैय्या एन्काउंटरची चौकशी करण्यात आली होती. तेव्हा हे एन्काउंटर बनावट असल्याचं उघड झालं होतं. याप्रकरणी मुंबई पोलिसातील १३ अधिकारी आणि पोलिसांना अटक करण्यात आली होती. त्यात प्रदीप शर्मांचाही समावेश होता. या प्रकरणात प्रदीप शर्मा यांना २००८ मध्ये निलंबितही करण्यात आले होते. रामनारायणचे वकील असलेले भाऊ ॲड. रामप्रसाद गुप्ता यांनी सातत्याने पाठपुरावा केल्यानंतर मुंबई उच्च न्यायालयाच्या आदेशाप्रमाणे एसआयटीने चौकशीअंती खटला भरला.
सेशन्स कोर्टाने सन २०१३ मध्ये ११ पोलिसांसह २१ जणांना दोषी ठरवून जन्मठेपेची शिक्षा ठोठावली होती. तर प्रदीप शर्मा यांना निर्दोष ठरवले होते. शर्माला निर्दोष ठरवण्याच्या निर्णयाविरोधात रामप्रसाद गुप्ता आणि राज्य सरकारनेही उच्च न्यायालयात अपील केले होते. तर दोषी ११ पोलिसांनी जन्मठेपेच्या शिक्षेविरोधात अपील केले होते. याविषयीच्या एकत्रित सुनावणीअंती न्यायमूर्ती रेवती मोहिते डेरे व न्यायमूर्ती गौरी गोडसे यांच्या खंडपीठाने ८ नोव्हेंबर २०२३ रोजी आपला निर्णय राखून ठेवला होता, तो आज मंगळवारी खंडपीठाने जाहीर केला.
