भुसावळ l वास्तव पोस्ट वृत्तसेवा
“सेवा ही संकल्प” हे ब्रीदवाक्य उराशी बाळगत मध्य रेल्वेच्या भुसावळ विभागाने आर्थिक वर्ष २०२५-२६ मध्ये प्रवाशांची सुरक्षा आणि रेल्वे मालमत्तेच्या संरक्षणासाठी उत्कृष्ट कामगिरी केली आहे. आरपीएफ (रेल्वे सुरक्षा बल) भुसावळ विभागाने ‘खंबीर तरीही मानवी’ (Firm but Humane) या धोरणाने कार्य करत गुन्हेगारी रोखण्यासोबतच सामाजिक बांधिलकी देखील जपली आहे.
प्रमुख मोहिमा आणि महत्त्वाची आकडेवारी:
१. मुलांचे आणि प्रौढांचे रक्षण :
आरपीएफने स्थानकांवर आणि गाड्यांमध्ये हरवलेल्या किंवा घर सोडून आलेल्या मुलांसाठी राबवलेल्या ‘नन्हे फरिश्ते’ मोहिमेतंर्गत ४८३ मुलांची (२६१ मुले आणि २२२ मुली) सुरक्षित सुटका केली. तसेच ‘डिग्निटी’ मोहिमेद्वारे १०७ गरजू प्रौढांना (५२ पुरुष आणि ५५ महिला) मदत मिळवून दिली.
२. अमली पदार्थ विरोधी कारवाई :
अमली पदार्थांच्या तस्करीला आळा घालण्यासाठी केलेल्या ५ कारवायांमध्ये आरपीएफने ८३.९५४ किलो गांजा जप्त केला. याची बाजारपेठ किंमत साधारणतः १४,६४,४५५ रुपये इतकी आहे. या प्रकरणी ९ जणांना अटक करण्यात आली.
३. प्रवाशांच्या साहित्याची सुरक्षा :
प्रवासादरम्यान विसरलेले किंवा चोरीस गेलेले सामान परत मिळवून देण्यासाठी आरपीएफने ५१३ प्रकरणांमध्ये यश मिळवले. यामध्ये एकूण १,७२,५७,२४४ रुपयांचा मालमत्ता (ऐवज) प्रवाशांना सुखरूप परत करण्यात आला.
४. जीव वाचवण्याचे कार्य :
रेल्वे परिसरात किंवा धावत्या ट्रेनमध्ये अपघाताच्या प्रसंगातून आरपीएफ जवानांनी आपल्या प्रसंगावधानाने १८ प्रवाशांचे प्राण वाचवले आहेत.
५. महिला आणि प्रवासी सुरक्षा :
महिला प्रवाशांच्या सुरक्षिततेसाठी (मेरी सहेली मोहीम) ३,७१२ जणांवर कारवाई करण्यात आली. तसेच ‘यात्री सुरक्षा’ अंतर्गत २९६ आरोपींना अटक करून प्रवाशांवरील गुन्हेगारीला लगाम लावला.
अन्य महत्त्वाच्या कारवाया :
● रेल्वे भूमी : ९ मोहिमांतून सुमारे ५,६५,६८३ चौ. फूट रेल्वे जमीन अतिक्रमणातून मुक्त केली.
● अनधिकृत फेरीवाले : अनधिकृत विक्री करणाऱ्या ११,२२७ जणांवर कारवाई करत त्यांना अटक केली.
● वेळेचे पालन : विनाकारण अलार्म चेन ओढणाऱ्या १,९८२ जणांवर गुन्हे दाखल केले.
● मातृशक्ती : रेल्वे प्रवासादरम्यान प्रसूती वेदना झालेल्या ७ महिलांना आरपीएफने तातडीने मदत पुरवून माणुसकीचे दर्शन घडवले.
भुसावळ विभागाच्या या अष्टपैलू कामगिरीमुळे रेल्वे प्रवास अधिक सुरक्षित आणि विश्वासार्ह झाला असून, रेल्वे मालमत्तेचे नुकसान करणाऱ्यांवरही वचक निर्माण झाला आहे.
