वास्तव पोस्ट l नागपूर : जागतिक स्तरावर युद्धपद्धती आणि सुरक्षा व्यवस्था वेगाने बदलत असताना, तंत्रज्ञान आणि सामरिक क्षमता भारतासाठी अत्यंत महत्त्वाच्या ठरत आहेत. याच पार्श्वभूमीवर नागपूरच्या मिहान परिसरात सोलर डिफेन्स अँड एरोस्पेस लि. च्या ‘रोबोटिक्स अँड युएव्ही (UAV) फॅसिलिटी’चे भूमिपूजन व कोनशिला अनावरण करण्यात आले. राज्याचे उपमुख्यमंत्री देवेंद्र फडणवीस आणि केंद्रीय मंत्री नितीन गडकरी यांच्या हस्ते हा सोहळा पार पडला.
संरक्षण क्षेत्रात आत्मनिर्भरतेचे पाऊल
या प्रसंगी बोलताना उपमुख्यमंत्री फडणवीस यांनी सोलर ग्रुपचे चेअरमन पद्मश्री सत्यनारायण नुवाल यांचे विशेष अभिनंदन केले. “पिनाका मिसाईल, UAV ड्रोन आणि विविध अत्याधुनिक संशोधनांच्या माध्यमातून सोलर ग्रुपने भारताच्या सामरिक शक्तीला नवी दिशा दिली आहे. डिफेन्स मॅन्युफॅक्चरिंग क्षेत्रातील या समूहाचे योगदान देशासाठी अभिमानास्पद आहे,” असे त्यांनी नमूद केले.
आधुनिक युद्धपद्धती आणि ‘न्यू वर्ल्ड ऑर्डर’
मुख्यमंत्री फडणवीस यांनी स्पष्ट केले की, सध्या जगात एक नवीन जागतिक व्यवस्था (New World Order) निर्माण होत आहे. यात आपले सार्वभौमत्व टिकवून ठेवण्यासाठी रोबोटिक्स, ड्रोन आणि मानवरहित वाहनांसारख्या आधुनिक तंत्रज्ञानाची निर्मिती अनिवार्य आहे. ही फॅसिलिटी केवळ युद्धजन्य परिस्थितीतच नाही, तर जागतिक पुरवठा साखळीत (Global Supply Chain) भारताचे स्थान बळकट करण्यासाठी महत्त्वाची ठरेल.
महाराष्ट्राचे विशेष धोरण आणि रोजगार
महाराष्ट्र सरकारने डिफेन्स आणि एरोस्पेस क्षेत्रासाठी स्वतंत्र धोरण आखले असून ‘डीप टेक’, कृत्रिम बुद्धिमत्ता (AI), क्वांटम कम्प्युटिंग आणि सेमीकंडक्टर इकोसिस्टिममध्ये गुंतवणूक वाढवण्यावर भर दिला आहे. मिहान परिसरातील या प्रकल्पामुळे सध्या सुमारे १,२०,००० लोकांना रोजगार मिळत आहे. सोलर ग्रुपच्या या नवीन गुंतवणुकीमुळे नागपूर आणि मिहान परिसरातील तंत्रज्ञान विकासाला अधिक वेग येणार असून औद्योगिक विकास होईल.
या कार्यक्रमाला राज्यमंत्री ॲड. आशिष जयस्वाल, आमदार चरणसिंग ठाकूर, सोलर ग्रुपचे व्यवस्थापकीय संचालक मनीष नुवाल आणि इतर मान्यवर उपस्थित होते. या प्रकल्पामुळे भारताच्या संरक्षण दलांना भविष्यात अत्याधुनिक स्वदेशी तंत्रज्ञान उपलब्ध होणार आहे.
