मानव सेवा विद्यालयात 'जागतिक महिला दिन' उत्साहात साजरा -

जळगाव ( वास्तव पोस्ट ) : मानव सेवा विद्यालयात आज दि. ८ मार्च शनिवार रोजी जागतिक महिला दिन उत्साहात साजरा करण्यात आला. कार्यक्रमाच्या सुरुवातीला माध्यमिक मुख्याध्यापिका प्रतिभा सूर्यवंशी, बालवाडी मुख्याध्यापिका मुक्ता पाटील यांच्या हस्ते प्रतिमापूजन व दीपप्रज्वलन करण्यात आले.

महिला दिनानिमित्त इयत्ता १ ली ते ९ वी च्या वर्गातील विद्यार्थिनींनी कर्तृत्ववान महिलांच्या वेशभूषा साकारुन आपल्या मनोगतातून त्यांच्या कार्यास उजाळा दिला. यात पूर्वी पाटील व भूमिका पाटील –जिजामाता, प्रतीक्षा बाविस्कर व काव्या पाटील –झाशीची राणी, उत्कर्षा सोनार व सोनाक्षी बोरसे –अहिल्याबाई होळकर, योगेश्वरी पवार व मोहिनी चौधरी –बहिणाबाई चौधरी, मानसी धनगर व साक्षी वानखेडे –प्रतिभाताई पाटील, विद्या निकुंभ व डिंपल नन्नवरे –सावित्रीबाई फुले, किरण बेदी व अजब्दी पाटील –ताराराणी, साक्षी पाटील व साक्षी वानखेडे –लता मंगेशकर, तसेच यामिनी साळुंखे –मदर तेरेसा यांच्या वेशभूषा साकारल्यात.

सदर कार्यक्रमात दर्शना ठाकूर या विद्यार्थीनीने वकृत्व सादर केले तर योगिनी राठोड इयत्ता ९ वी च्या विद्यार्थीनीने सावित्रीबाई फुले यांची वेशभूषा करून सावित्रीबाई फुले यांच्या जीवनातील प्रसंगावर नाटिका सादर केली. यावेळी जागतिक महिला दिनानिमित्त इयत्ता ८ वी ते इयत्ता ९ वी च्या विद्यार्थ्यांची परिसरात रॅली देखील काढण्यात आली.

मनिषा तायडे व रत्ना चोपडे यांनी विद्यार्थ्यांना माहिती सांगितली. तर सुनील दाभाडे यांनी कर्तृत्ववान महिलांवर सुरेल गीत सादर केले. या प्रसंगी मुख्याध्यापिकांनीही विद्यार्थ्यांना महिला दिनानिमित्त मार्गदर्शन केले.